बागमती प्रदेश सरकारले बजेट विनियोजन गरी निर्माणकार्य भइरहेको छाप भञ्ज्याङ (फट्केश्वर) सडकखण्डमा आज तीन मन्त्रीहरु सहितको टोलीले आकस्मिक छड्के अनुगमन गरेको छ ।
अनुगमन टोलीमा बागमती प्रदेशका आर्थिक मामिला तथा योजना मन्त्री प्रभात तामाङ, खानेपानी, उर्जा तथा सिंचाइ मन्त्री कृष्णकुमार तामाङ र संस्कृति तथा पर्यटन मन्त्री सुरेश श्रेष्ठ उपस्थित हुनुहुन्थ्यो ।

इन्द्रावती गाउँपालिकाको सूचना

भौतिक पूर्वाधार कार्यालय सिन्धुपाल्चोक, चौताराबाट ठेक्का आह्वान भई ८८सिम्रन–स्वराज जे.भी.८८मार्फत निर्माण भइरहेको सो योजनाको अनुगमनका क्रममा निर्माण कार्य मापदण्ड विपरीत, लापरबाहीपूर्वक र गुणस्तरहीन देखिएको भन्दै तत्काल कार्य रोक्न निर्देशन गरिएको छ ।
मन्त्रीहरूले कार्यालय प्रमुख प्रकाश पौडेल तथा प्राविधिक टोलीलाई साथमा लिएर भएको निरीक्षणमा प्राविधिक मापदण्डअनुसार गुणस्तरीय निर्माण सुनिश्चित गर्न कडाइका साथ निर्देशन दिनुभएको हो ।

सडक निर्माणमा भइरहेको ढिलाइ, गुणस्तरहीन सामाग्रीको प्रयोग र कामको बेवास्ताप्रति कडा आपत्ति जनाउँदै मन्त्री कृष्णकुमार तामाङले सिन्धुपाल्चोक क्षेत्र नम्बर २ का नागरिकहरूको अत्यन्तै महत्त्वपूर्ण यो सडक वर्षौँदेखि पक्कीरूपमा निर्माण हुन नसक्दा स्थानीयले ठूलो दुःख भोग्दै आएको बताउनुभयो । आफु निर्वाचित भएपछि निरन्तर बजेट व्यवस्थापन गर्दै बहुवर्षीय स्वीकृति ल्याएर ठेक्का प्रक्रिया पूरा गरिएको भन्दै अब लापरबाही कदापि सह्य नहुने चेतावनी दिनुभयो ।

उहाँले निर्माण व्यवसायी र कार्यालयका प्राविधिकहरूलाई गुणस्तरयुक्त, दीर्घकालीन र मापदण्डअनुसारको काम तत्काल सुरु गर्न स्पष्ट निर्देशन दिनुभयो ।

यस सडक निर्माणले स्थानीय यातायात, स्वास्थ्य उपचार, कृषि उत्पादनको आपूर्तिसहित दैनिक जीवनमा ठूलो परिवर्तन ल्याउने अपेक्षा गरिएको छ। बागमती प्रदेश सरकारको प्रत्यक्ष निगरानीमा सञ्चालन भइरहेका पूर्वाधार योजनाहरू सार्वजनिक हित, पारदर्शिता र जिम्मेवारीपूर्ण गतिमा अघि बढ्नुपर्ने मन्त्रीहरूको कथन छ । सरकारको बजेटमा परि बहुवर्षीय स्वीकृति प्राप्त भई निर्माण सुरु भएको यो आयोजना अब नियमित अनुगमन, गुणस्तर परीक्षण र समयसीमा पालनासहित अघि बढाइने जनाइएको छ ।