नवलपुर । इन्द्रावती गाउँपालिकाका सचिवहरूले एक सूत्रीय माग राख्दै गाउँपालिकामा ज्ञापनपत्र बुझाएका छन । करिब ३० वर्षसम्म गरेको सेवाको बेवास्ता गरि पालिकाले आफूहरूलाई हटाउन खोजिएको भन्दै सचिवहरुले यसबारे ध्यानाकर्षण गराउन पालिका समक्ष ज्ञापनपत्र बुझाएको जनाइएकाे छ ।

आफूहरुले जीवनको ऊर्जाशील समय सेवामा बिताए पनि यसको सही मूल्यांकन गर्न नसकेको बताउँदै यसको बारेमा पालिकाको गम्भीर ध्यानाकर्षण हुनुपर्ने उनिहरूकाे भनाई छ । करारमा काम गर्दै आएका वडा नम्बर १ का सचिव गोपाल तामाङ, वडा नम्बर २ का सचिव कृष्णबहादुर गिरी, वडा नम्बर ५ का सचिव दीपक अधिकारी, वडा नम्बर ८ का सचिव गोपीकृष्ण न्याैपाने र वडा नम्बर ९ का सचिव तिलक प्रसाद कोइराला लगायतलाई पालिकाले सेवाबाट हटाउन खोजिएको भन्दै उनिहरुले पालिकाको ध्यानाकर्षणको लागी संयुक्त ज्ञापनपत्र बुझाएका हुन ।

आफूहरु कारार सेवाबाट निवृत्त हुन मन्जुर रहेको तर सेवा अवधिको गणना गरि १ वर्ष १ महिनाको तलब भत्ता हिसाव गरि एकमुष्ठ सेवा निवृत्त उपदानको स्वरुप पाउनुपर्ने उनिहरूकाे माग छ । मौजुदा निति वा नितिको अभाव भए निति निर्माण गरेर भए पनि उक्त उपदान उपलब्ध गराउने व्यवस्था गरिनु पर्नेमा उनिहरूले जाेड दिए । सो नगरिए सम्म गाउँपालिकामा शान्तिपुर्ण आन्दोलनका श्रृखलाहरु अगाडी बढाउने चेतावनी समेत दिइएको छ ।

ज्ञापनपत्र बुझाउने क्रममा पालिका अध्यक्ष गाउँपालिकामा अनुपस्थित भएकोले गाउँपालिकाका उपाध्यक्ष सोभना तामाङ समक्ष ज्ञापन पत्र बुझाइएकाे सचिवहरूले जानकारी दिए । ज्ञापनपत्र बुझ्दै उपाध्यक्ष सोभना तामाङले गाउँपालिका अध्यक्ष पालिकामा उपस्थित भएपछि थप कुरा गरिने बताइन ।