सिन्धुपाल्चोकमा ४० मेगावाटको बलेफी खोला जलविद्युत् आयोजना निर्माण हुने भएको छ । बलेफी इनर्जी प्रालिले जुगल गाउँपालिकामा अवस्थित बलेफी खोलाको पानीलाई उपयोग गरेर जलविद्युत् आयोजना निर्माण गर्न लागेको हो ।
यो जलविद्युत् आयोजनाको विस्तृत अध्ययन भइसकेको छ । आयोजना निर्माण अघि बढाउन कम्पनीले विद्युत विकास विभाग समक्ष उत्पादन अनुमति पत्र (जेनेरेस लाइसेन्स) माग गर्दै आवेदन दिएको थियो ।
अध्ययन प्रतिवेदन अनुसार आयोजनाका मुख्य भौतिक संरचनाहरु बलेफी खोलाको दायाँ किनारमा इन्टेक तथा संरचनाहरु रहनेछन् । ४१४५.३७ मिटरको हेडरेस टनेल निर्माण गरिनेछ ।
विद्युत् गृह भुमिगत हुनेछ । १३२ केभीको ३० किलोमिटर प्रसारणलाइन निर्माण गरेर यो आयोजनाबाट उत्पादित विद्युत् राष्ट्रिय प्रसारण प्रणालीमा समाहित गरिनेछ । आयोजनाबाट आगामी ३ वर्षमा व्यवसायिक उत्पादनको लक्ष्य छ ।
