सिन्धुपाल्चाेक । मेलम्ची नगरपालिकाले छ महिनामा ५३ करोड ८७ लाख ४५ हजार तीन सय रुपैयाँ आम्दानी गरेकाे छ ।

चालु आर्थिक बर्ष २०८०/८१ को माघ मसान्तसम्म संघीय सरकार, प्रदेश सरकारबाट प्राप्त हुने वित्तिय समानिकरण अनुदान, सशर्त अनुदान, राजस्व बाँडफाँड र नगरपालिकाको आन्तरिक आम्दानी गरि कूल जम्मा ५३ करोड ८७ लाख ४५ हजार ३ सय १५ रुपैयाँ ९९ पैसा आम्दानी भएको नगरसभाको १५ औं हिउँदे अधिवेशनमा नगर प्रमुख आइतमान तामाङले प्रगती प्रतिवेदनमा उल्लेख गरेका छन । खर्च तर्फ चालु खर्च रु. २७ करोड २ लाख ५९ हजार ८ सय ७६ रुपैयाँ २१ पैसा र पँजीगत खर्च तर्फ रु १७ करोड ६८ लाख २ हजार ६ सय २९ रुपैयाँ गरी जम्मा रु. ४४ करोड ७० लाख ६२ हजार ५ सय ५ रुपैयाँ २१ पैसा खर्च भएको प्रतिवेदनमा उल्लेख छ ।

नगर प्रमुख तामाङले प्रश्तुत गरेको प्रतिवेदन अनुसार गत माघ मशान्तसम्म नगरले २१ करोड २० लाख १३ हजार रुपैया आन्तरिक आम्दानी गरेको छ । नगरले ६५ करोड आन्तरिक राजश्व संकलन गर्ने वार्षिक लक्ष्य लिएको छ ।

नगरपालिकाले कृषकहरुलाई प्रोत्साहन गर्न सुरु गरेको पशु बिमा कार्यक्रममा ५० प्रतिशत अनुदान बापत दुई लाख ५० हजार रुपैयाँ वितरण गरेको जनाएको छ । पशु पालक किसानलाई राहत प्रदान गर्न सुरु गरिएको सुत्केरी पशु प्रोत्साहन कार्यक्रम मार्फत किसानहरुलाई १४ लाख २३ हजार रुपैयाँ प्रदान गरिएको प्रमुख तामाङले जानकारी दिए । नगरले बैंकिङ प्रणाली मार्फत वितरण हुँदै आएको सामाजिक सुरक्षा भत्ता रकम चालु आर्थिक वर्षको दोस्रो त्रैमासिकदेखि विधुतीय भुक्तानी प्रणालीको माध्यमबाट वितरणको व्यवस्था मिलाएको छ ।

राष्ट्रिय प्राकृतिक स्रोत तथा वित्त आयोगले आर्थिक वर्ष २०७९÷०८० को कार्यसम्पादनमा आधारित वित्तीय समानिकरण अनुदानका लागि गरेको मूल्यांकनमा ५३ दशमलव ८४ अंक प्राप्त गरेर देसमै चौथो स्थान हासिल गरेकोमा जनप्रतिनिधि र कर्मचारीलाई धन्यवाद दिंदै नगरप्रमुख तामाङले आगामी दिनमा अझ उत्कृष्ट नतिजा हासिल गर्ने गरी लाग्न आग्रह गरेका थिए ।

सभाले उपप्रमुख उमा प्रधानले पेश गरेको नगरपालिकाको आर्थिक ऐन २०८० संशोधन विधेयक तथा विनियोजन ऐन २०८० को संशोधन विधेयक र आर्थिक वर्ष २०८०÷८१ को संशोधित बजेट पारित गरेको थियो । सभामा पेश भएको विभिन्न ११ प्रस्तावहरु सभाले सर्वसम्मत पारित गरेको थियो ।