मेलम्ची, सिन्धुपाल्चाेक । कार्यसम्पादन मुल्याङकनमा सिन्धुपाल्चाेककै पहिलाे पालिका र देशकै चाैथाे स्थान हाँसिल गर्न सफल भएपछि मेलम्ची नगरपालिकाका प्रमुख आइतमान तामाङले अझ उत्कृष्ट नतिजा आउनेगरि काम गर्ने बताएका छन । साथै जनप्रतिनिधि र कर्मचारीहरूलाई उनले अझ उत्कृष्ट नतिजा आउनेगरी काम गर्न आग्रह गरेका छन ।
नगरसभाको १५ औं हिउँदे अधिवेशनमा प्रगती प्रतिवेदन प्रस्तुत गर्दै नगर प्रमुख आइतमान तामाङले राष्ट्रिय प्राकृतिक स्रोत तथा वित्त आयोगले आर्थिक वर्ष २०७९÷०८० को कार्यसम्पादनमा आधारित वित्तीय समानिकरण अनुदानका लागि गरेको मूल्यांकनमा ५३ दशमलव ८४ अंक प्राप्त गरेर देसमै चौथो स्थान हासिल गरेकोमा जनप्रतिनिधि र कर्मचारीलाई धन्यवाद दिंदै नगरप्रमुख तामाङले आगामी दिनमा अझ उत्कृष्ट नतिजा हाँसिल गर्ने गरी लाग्न आग्रह गरेका थिए ।
नगर प्रमुख तामाङले प्रश्तुत गरेको प्रतिवेदन अनुसार गत माघ मशान्तसम्म नगरले २१ करोड २० लाख १३ हजार रुपैयाँ आन्तरिक आम्दानी गरेको छ । नगरले ६५ करोड आन्तरिक राजश्व संकलन गर्ने वार्षिक लक्ष्य लिएको छ ।
सभाले नगरपालिकाको आर्थिक ऐन २०८० संशोधन विधेयक तथा विनियोजन ऐन २०८० को संशोधन विधेयक र आर्थिक वर्ष २०८०÷८१ को संशोधित बजेट पारित गरेको थियो । सभामा पेश भएको विभिन्न ११ प्रस्तावहरु सभाले सर्वसम्मत पारित गरेको थियो ।
