सिन्धुपाल्चाेक । मेलम्ची नगरपालिकाको प्रवक्तामा राजु रायमाझी नियुक्त भएका छन् ।

आइतवार बसेको नगर कार्यपालिकाको बैठकबाट मेलम्ची नगरपालिका वडा नं. ५ का वडा अध्यक्ष राजु रायमाझीलाई प्रवक्तामा नियुक्त गर्ने निर्णय भएको हो । मेलम्ची नगरपालिकाकाे नगर प्रमुखका स्वकिय सचिव मानकाजी पाख्रीनले मेलम्ची नगरपालिका वडा नं. ५ का वडा अध्यक्ष राजु रायमाझीलाई कार्यपालिका बैठकले प्रवक्तामा नियुक्त गर्ने निर्णय भएकाे बताए ।

मुलुक संघिय संरचनामा गएपछि भएको स्थानीय तहको निर्वाचन पछि निर्वाचित जनप्रतिनिधिहरु मध्येबाट एक जनालाई प्रवक्तामा नियुक्त गर्ने प्रावधान अनुसार रायमाझीलाई मनोनयन गरिएको नगरकार्यपालिकाले जनाएको छ ।

अब मेलम्ची नगर कार्यपालिकाको सबै गतिविधि प्रवक्ता मार्फत बाहिर ल्याउन सजिलो हुने बताइएको छ । १३ वडा रहेको मेलम्ची नगरपालिकामा सर्वसम्मतीमा सबै वडा अध्यक्षहरुको प्रस्तावमा रायमाझीलाई प्रवक्तामा मनोनयन गरिएको वडा नं. २ का अध्यक्ष नगेन्द्र प्रसाद खतिवडाले बताए । बैशाखमा भएको स्थानीयतहको निर्वाचनमा मेलम्ची ५ बाट नेपाली काँग्रेसका तर्फबाट रायमाझी उमेदवार बनेर विजयी भएका थिए ।