नेकपा सिन्धुपाल्चोक–१ बाट सापकोटा र २ बाट दुलाल एकल सिफारिस
१० पुस, सिन्धुपाल्चोक ।
नेपाली कम्युनिष्ट पार्टी (नेकपा) सिन्धुपाल्चोकले प्रतिनिधिसभा निर्वाचनका लागि क्षेत्र नम्बर १ र २ बाट उम्मेदवार सिफारिस गरेको छ।
पार्टीको आज मेलम्चीमा बसेको क्षेत्र नम्बर २ को क्षेत्रीय समिति बैठकले आगामी प्रतिनिधिसभा निर्वाचनका लागि युवराज दुलाल ‘सरद’को एकल नाम सिफारिस गरेको हो। दुलाल हाल बागमती प्रदेश सभा सदस्यसमेत रहनुभएको छ।
त्यस्तै, क्षेत्र नम्बर २ बाट समानुपातिक तर्फ भगवती नेपाल, बलराम बी.के., रामलाल बी.के., वीरबहादुर तामाङ, लोकमान तामाङ, कमल माझी, पेमा ह्योल्मो र बलराम सुनारलाई सिफारिस गरिएको छ।
उता प्रतिनिधिसभा निर्वाचन क्षेत्र नम्बर १ बाट भने माधव सापकोटा ‘सुबोध’लाई एकल उम्मेदवारका रूपमा सिफारिस गरिएको छ। आज खाडिचौरमा सम्पन्न क्षेत्र नम्बर १ को भेलाले सापकोटाको नाम सर्वसम्मत रूपमा सिफारिस गरेको पार्टीले जनाएको छ।