सिन्धुपाल्चोक — हेलम्बु गाउँपालिका र आन्तरिक राजस्व कार्यालय काभ्रेपलाञ्चोकबीच स्थानीय स्तरमै कर सेवा उपलब्ध गराउने लक्ष्यसहित सोमबार समझदारीपत्रमा हस्ताक्षर गरिएको छ।

गाउँपालिका अध्यक्ष निमा ग्याल्जेन शेर्माले जानकारी दिएअनुसार अब प्यान दर्ता, कर चुक्ता तथा करसम्बन्धी सिफारिसजस्ता सेवा गाउँपालिकाबाटै प्राप्त गर्न सकिनेछ। यसले सेवाग्राहीलाई टाढा धाएर सेवा लिनुपर्ने समस्या घटाउने अपेक्षा गरिएको छ।

सम्झौतापछि करसम्बन्धी सेवा लिन धुलिखेल जानुपर्ने बाध्यता हट्ने बताइएको छ। कार्यक्रमका क्रममा प्रमुख कर अधिकृत अनमोलकुमार दाहालले स्थानीय तहबाट सेवा विस्तारले कर प्रणालीलाई अझ सहज बनाउने बताए।

त्यसैगरी, प्रमुख प्रशासकीय अधिकृत बेनीबहादुर मोक्तानले सेवा प्रवाहलाई प्रविधिमैत्री र पारदर्शी बनाउँदै नागरिकलाई छिटो सेवा दिने प्रतिबद्धता व्यक्त गरे। कार्यक्रममा वडाध्यक्ष दावा ग्याल्जेन लामा लगायत जनप्रतिनिधि र सरोकारवालाको उपस्थिति रहेको थियो।