पाँचपोखरी थाङपाल गाउँपालिका वडा नम्बर ७ र ८ अन्तर्गत लाँगर्चे–सोले–कालढुङ्ग–भोटेनाम्लाङ जोड्ने अनुमानित ११० मिटर लम्बाइको झोलुङ्गे पुल निर्माणका लागि आज शिलान्यास कार्यक्रम सम्पन्न भएको छ। उक्त पुल अनुमानित बजेट रु १ करोड २४ लाख मा सम्पन्न हुने जनाइएको छ।
यस महत्वपूर्ण आयोजनाको निर्माण कार्य कादुरी एग्रिकल्चर ब्रिटिश गोर्खा वेल्फेयर, पोखराको सहयोगमा अगाडि बढाइएको हो। पुल निर्माणका लागि वडा नम्बर ३ का तत्कालिन अध्यक्ष निमाछिरिङ तामाङ, वडा नम्बर ८ का अध्यक्ष बिष्णुबहादुर खड्का, वडा नम्बर ७ का अध्यक्ष सुके तामाङ को समन्वय तथा सहजीकरणमा बजेट व्यवस्थापन सफलतापूर्वक भएको थियो।
साथै कार्यक्रममा  स्थानिय युवा राजन भुजेल, निवर्तमान वडा नम्बर २ का अध्यक्ष पासाङ स्याङबो, तथा कार्यपालिका सदस्य गीता धितालको उपस्थिति रहेको गाउँपालिकाका कर्मचारी सरोज धितालले जानकारी दिनुभयो ।

कार्यक्रममा बोल्दै गाउँपालिका अध्यक्ष टासी लामाले आफ्नो दोस्रो कार्यकालभित्रै उक्त झोलुङ्गे पुल निर्माण सम्पन्न गर्ने प्रतिबद्धता व्यक्त गर्नुभयो। उहाँका अनुसार निर्माण कार्य तीव्र गतिमा अगाडि बढिसकेको छ र चार महिनाभित्र पुल निर्माण सम्पन्न गरिने लक्ष्य राखिएको छ।
पुल निर्माण सम्पन्न भएपछि वडा नम्बर ७ भोटेनाम्लाङ र वडा नम्बर ८ लाँगर्चे बीच सहज, सुरक्षित तथा नियमित आवतजावत सम्भव हुने विश्वास स्थानीयवासीहरूले व्यक्त गरेका छन्। लामो समयदेखि पुलको प्रतीक्षामा रहेका स्थानीय बाआमा, दाजुभाइ तथा दिदीबहिनीहरूका लागि यो पुल महत्वपूर्ण र दीर्घकालीन पूर्वाधार बन्ने अपेक्षा गरिएको छ।

इन्द्रावती गाउँपालिकाको सन्देश