सिन्धुपाल्चोक जिल्लाको पाँचपोखरी थाङपाल गाउँपालिकामा “शिक्षा, स्वास्थ्य, कृषि र पर्यटन ः समृद्ध पाँचपोखरीको मूलधन” भन्ने मूल नाराका साथ आयोजना गरिएको पाँचपोखरी सिकाइ मेला–२०८२ सफलतापूर्वक सम्पन्न भएको छ ।
पाँचपोखरी थाङपाल गाउँपालिकाको आयोजना तथा श्री क्षेत्रपालेश्वरी माध्यमिक विद्यालयको सह–आयोजनामा सम्पन्न मेलाको उद्घाटन गाउँपालिका अध्यक्ष टासी लामाले गर्नुभएको हो ।
उद्घाटन समारोहमा बोल्दै अध्यक्ष लामाले शिक्षालाई केवल किताबी ज्ञानमा सीमित नराखी व्यवहारिक, सीपमूलक र स्थानीय आवश्यकतासँग जोड्नुपर्ने आवश्यकता औंल्याउनुभयो ।
“विद्यार्थीले कक्षाकोठामा सिकेको ज्ञानलाई व्यवहारमा उतार्न सके मात्रै शिक्षा सार्थक हुने भन्दै यस्ता सिकाइ मेलाले विद्यार्थीको सिर्जनशीलता उजागर गर्नुका साथै कृषि, स्वास्थ्य र पर्यटनजस्ता क्षेत्रसँग शिक्षा जोड्न मद्दत पु¥याउँने बताउनुभयो ।
श्री क्षेत्रपालेश्वरी माध्यमिक विद्यालयको प्राङ्गणमा आयोजित मेलामा गाउँपालिकाभित्रका विभिन्न विद्यालयका विद्यार्थीहरूले शैक्षिक परियोजना, विज्ञान तथा प्रविधि सामग्री, कृषि उत्पादन, स्थानीय सीप र सिर्जनात्मक प्रदर्शनी प्रस्तुत गरेका थिए । मेलामा विद्यार्थीहरूको सक्रिय सहभागिता देखिएको थियो ।

इन्द्रावती गाउँपालिकाको सूचना

विद्यालयका प्रधानाध्यापक भानुभक्त धितालले यस्ता कार्यक्रमले विद्यार्थीको आत्मविश्वास, प्रस्तुतीकरण क्षमता र व्यवहारिक ज्ञानमा उल्लेखनीय सुधार आउने बताउनुभयो ।
“पाठ्यक्रमलाई जीवनसँग जोड्ने माध्यमका रूपमा सिकाइ मेला अत्यन्त उपयोगी भन्दै विद्यार्थीहरूमा नयाँ सोच, अनुसन्धान गर्ने बानी र नेतृत्व विकासमा यस्ता कार्यक्रम प्रभावकारी देखिएको उहाँले प्रतिक्रिया दिनुभयो ।
मेलाको अवलोकनका क्रममा शिक्षक, विद्यार्थी, अभिभावक, शिक्षाप्रेमी, बुद्धिजीवी तथा स्थानीयवासीहरूको उल्लेखनीय सहभागिता रहेको थियो । सहभागीहरूले स्थानीय तहमा शिक्षा, कृषि र पर्यटनलाई जोड्ने यस्ता रचनात्मक कार्यक्रम निरन्तर सञ्चालन गर्नुपर्ने सुझाव दिएका छन् ।

पाँचपोखरी थाङपाल गाउँपालिकाले आगामी दिनमा पनि व्यवहारिक सिकाइ, सीप विकास र स्थानीय विकासलाई केन्द्रमा राखेर यस्ता शैक्षिक कार्यक्रमलाई निरन्तरता दिने जनाएको छ । कार्यक्रममा रोबर्टबाट कैँची प्रदान गरि प्रमुख अतिथिले उद्घाटन गर्नुभएको थियो । १० वटा माध्यमिक र ९ वटा आधारभुत गरि १९ वटा विद्यालय सहभागि रहेको मेला विद्यालय व्यवस्थापन समितिका अध्यक्ष दिनेश श्रेष्ठको अध्यक्षतामा भएको हो ।