सिन्धुपाल्चाेक । इन्द्रावती गाउँपालिका वडा नम्बर ४ टाकुरेका आगलागी पीडित परिवारलाई अमेरिका बस्दै आएका समाजसेवी राम श्रेष्ठले ५० हजार नगद सहयोग गरेका छन ।

टाकुरे स्थित रामकृष्ण गजुरेल तथा सावित्री सापकोटा (गजुरेल) को घर तथा कुखुराको टहरो पूर्णरुपमा क्षति भएकोमा उनले दुख व्यक्त गरे । आफूले यो दुखको घडीमा केही सहयोग गरेको श्रेष्ठले जानकारी दिए ।

आज मेलम्चीका व्यावसायी मनोज अधिकारीको समन्वयमा सो सहयोग रकम पीडितलाई हस्तान्तरण गरीएको छ । पाँचपोखरी थाङ्पाल गाउँपालिका घर भई हाल अमेरिका बस्दै आएका राम श्रेष्ठले यसअघि पनि विभिन्न समयमा आईपरेको विपद तथा जटिल रोग लागेकाहरूलाई उपचारमा सहयोग गर्दै आएका छन । साथै श्रेष्ठले सामाजिक कामहरूमा पनि सहयोग गर्दै आएका छन ।

पिडितलाई रकम हस्तान्तरण गर्दै व्यावसायी मनाेज अधिकारीले अब आउने दिनमा व्यावसायलाई पुरानै अवस्थामा लैजान सहयाेग गर्ने राम श्रेष्ठ तथा पार्वती श्रेष्ठलाई धन्यवाद ज्ञापन गरे । दु:खमा परेकाे बेलामा सबैले सहयाेग गर्नुपर्नेमा युवा व्यवसायी अधिकारीले जाेड दिए ।

सहयाेग रकम बुझ्दै पिडित रामकृष्ण गजुरेलले आफू दु:खमा परेकाे र भएको क्षतिमा आफु मात्रै नभई साथमा सबै रहेकाे बताए । बिदेशबाट पनि आफुलाई सहयाेग गरेकाेमा गजुरेलले राम श्रेष्ठलाई धन्यवाद दिए । साथै याे सहयाेग कहिल्यै नभुल्ने पनि उनले बताए ।

यही माघ १९ गते शुक्रबार इन्द्रावती ४ टाकुरेका रामकृष्ण गजुरेलको कुखुराको टहरोमा लागेको आगोबाट टहरोमा रहेका एक हजार कुखुरा सहित नजिकै रहेको ४ कोठे घर समेत जलेको थियो । आगलागीबाट अनुमानित ३५ लाख बराबरको क्षति भएको थियो ।