चौतारा । फागनु १४ गतेबाट सिन्धुपाल्चोकमा दादुरा–रुबेला विरुद्ध खोप अभियान सञ्चालन हुने भएको छ ।

जिल्लास्तरिय खोप समन्वय समिति, सरोकारवाला र सञ्चारकर्मीबीचको बुधबार सम्पन्न अन्तरक्रिया कार्यक्रममा जिल्लामा फागुन १४ गतेदेखि फागुन १९ गतेसम्म खोप अभियान सञ्चालन हुने स्वास्थ्य कार्यालय प्रमुख दुर्गा बजगार्ईले जानकारी दिए ।

राष्ट्रिय कार्यक्रम अनुसार नै जिल्लामा पनि यो अभियान सञ्चालन हुन लागेको उनको भनाई छ । दादुरा–रुबेला विरुद्ध खोप अभियानको बारेमा जानकारी दिंदै स्वास्थ्य प्रमुख बजगाँईले जिल्लामा आवश्यक तयारी पुरा हुने क्रममा रहेको जानकारी दिए ।

९ महिनादेखि ५ वर्ष उमेरसमूहलाई लक्षित गरि सञ्चालन हुने यो अभियानका लागि जिल्लाको १०३ वडाका २५३ खोप केन्द्र व्यवस्थापन गरिएको छ । अनुमति ३ सय सेसनमा १५ हजार ६ सय ६८ जना बालबालिकाहरुलाई खोप दिने लक्ष्य लिइएको छ । अभियानका लागि खोप स्वास्थ्यकर्मी ५ सय जना, स्वयमसेवक ६ सय ५० जना र एइएफआइ व्यवस्थापन र अनुगमनका लागि २२ जना स्वास्थ्यकर्मी र चिकित्सक परिचालन हुने स्वास्थ्य प्रमुख बजगाँइकाे भनाई छ ।