सिन्धुपाल्चाेक । चित्रकार तथा कलाकार विजेन्द्र श्रेष्ठले मेलम्ची नगरपालिका वडा नम्बर १२ बाहुनेपाटी बगरमा एकल चित्रकला प्रदर्शनी गरेका छन । चित्रमा आजभोलि आधुनिकिकरणको नाममा प्रकृतिलाई कुरुपता तिर धकेलिँदै गरेको अवस्थालाई चित्रण गरिएको छ ।
अस्तित्व नामक चित्रमा इन्द्रावतीको नदि दोहन, सडक लगायत अन्य संरचना बनाउने नाममा दिनप्रतिदिन भइरहेको प्रकृति दोहनको विरुद्ध श्रेष्ठले कोशि पुजाको अवसरमा एकल चित्रकला प्रदर्शनी गरेका हुन । उनले नेपाल प्राकृतिक सुन्दर अनुपम नमुना मुलुक रहेको भन्दै हामी सबै प्राणिहरु प्रकृतिका अभिन्न अंग रहेको र प्रकृति बिना हाम्रो अस्तित्व सम्भव नभएको चित्र मार्फत प्रस्तुत गरेका हुन ।
विकासको निमित्त इन्द्रावतीको छातिमा मानवनिर्मित ठुला डोजरहरु सलबलाइ रहेको देख्दा त्यो बाल्यकाल सङ्ग जोडिएको इन्द्रावती को सम्झना दिलाउने श्रेष्ठकाे भनाई छ । मृग, चराचुरुङगीहरु र माछाहरु नाचिरहने ठाँउमा आज डोजर र गाडी गुडिरहँदा आफ्नै शरीर माथी दौडिरहेको जस्तो भान हुने भन्दै श्रेष्ठले एक कलाकारको नाताले लुकेर रहेको पिडाहरु आफ्नाे क्यान्भासमा रङहरुको मध्यमबाट दर्शाउने प्रयास गरेको बताएका छन ।
चित्रको मेलम्ची नगरपालिकाका प्रमुख आइतमान तामाङ, उपप्रमुख उमा प्रधान, वडा अध्यक्षहरु लगायत स्थानियले अवलोकन गरे । अवलोकन पछि नगर प्रमुख तामाङले यहाँको विगतको सुन्दरतालाई झल्काउँदै तयार पारिएको चित्रले नगरपालिकाको ध्यानाकर्षण भएको बताए । उनले आगामी दिनमा यहाँको प्रकृतिलाई जोगाउँदै कसरी अघि बढ्ने र कसरि ब्यबस्थापन गर्दै अघि बढ्ने भन्ने कुरामा आफु लागिरहेको जानकारी दिए ।
