मेलम्ची । जिल्ला प्रशासन कार्यालय सिन्धुपाल्चोक, उद्योग तथा वाणिज्य कार्यालय सिन्धुपाल्चोक, खाद्य प्रविधि तथा गुणस्तर कार्यालय धुलिखेल र मेलम्ची नगरपालिकाको संयुक्त टोलिले मंगलबार मेलम्ची बजार क्षेत्रमा रहेका बिभिन्न होटल तथा पसलहरुको एकसाथ बजार अनुगमन गरेको छ ।

बजार अनुगमनका क्रममा खाद्य पसल ९, होटल ४, बेकरी तथा मिठाई पसल ४, हार्डवेयर २, खुल्ला रुपमा पेट्रोलियम पदार्थ बिक्रि गर्ने पसल ४, भेटेरीनरी तथा औषधी पसल ५ गरी २८ होटल तथा पसलहरुमा बिज्ञ टोली सहित अनुगमन गरिएको सहायक प्रमुख जिल्ला अधिकारी जित बहादुर भण्डारीले जानकारी दिए ।

अनुगमनका क्रममा म्याद गुज्रिएका बिभिन्न सामानहरु जफत गरी खाद्य सुरक्षा सम्बन्धि मापदण्ड पुरा नगरेको विजी बेकरी हाउस मेलम्चीलाई १५ हजार जरीवाना गरिएको उद्योग तथा वाणिज्य कार्यालयका प्रमुख बिश्वनाथ काफ्लेले बताए । उनले अनुमति बिना बजार क्षेत्रमा बोतलमा राखि पेट्रोलियम पदार्थ बिक्रि वितरण गर्ने ४ वटा पसलहरुबाट ८० लिटर पेट्रोल समेत जफत गरी एक पटकलाई सम्झाई बुझाई गरीएको पनि जानकारी दिए । यसैबिच जफत गरीएको अखाद्य बस्तु नष्ट गरिने र पेट्रोलियम पदार्थलाई नियमानुसार बिक्रि गरी राजश्व दाखिला गरीने उनको भनाई छ ।

यस्तै भेटेरीनरी तथा औषधी पसलहरुको अनुगमनको क्रममा व्यवसायीहरुलाई मेलम्ची नगरपालिकाका जनस्वास्थ्य शाखा प्रमुख अस्मिता भण्डारीले औषधीको म्याद सकिनु भन्दा १ महिना अगावै फिर्ता गर्न, बिषादी विक्रेता इजाजत पत्र पसलमा राख्न, विक्रेताले मास्क, ग्लोब्स, जुत्ता, चश्मा लगायतका सुरक्षा विधीलाई अवलम्बन गर्न सल्लाह दिइन ।