भोटेकोसी गाउँपालिका–१ लिस्तीस्थित चार सय वर्ष पुरानो ज्याङ्तेर लिस्ती पावो गुम्बाको पुनःनिर्माणका लागि भारतीय सरकारले ९ करोड ८३ लाख अनुदान उपलब्ध गराएको छ ।

भारत सरकारको पुनर्निर्माण अनुदान परियोजनाअन्तर्गत प्राप्त सहयोगबाट गुम्बा निर्माण सुरु गरिएको छ । स्थानीय सहयोगमा बनाएको गुम्बालाई भूकम्पले ध्वस्त बनाएका कारण पुनर्निर्माण हुन सकेको थिएन । स्थानीयको लामो प्रयासपछि सहरी विकास तथा भवन आयोजनाको केन्द्रीय आयोजना कार्यान्वयन इकाईले कार्यान्वयन गर्नेगरी बिहीबार गुम्बाको शिलान्यास गरिएको छ ।

भोटेकोसी गाउँपालिकाका अध्यक्ष पासाङ नोर्बू शेर्पा, कार्यान्वयन इकाइका निर्देशक प्रमुख कोषनाथ अधिकारी र नेपालस्थित भारतीय दूतावासका द्वितीय सचिव प्रशान्त कुमार सोनाले आज संयुक्तरुपमा गुम्बा शिलान्यास गरे । उक्त गुम्बा २०८२ साल फागुनमा पूरा गर्ने लक्ष्य राखिएको छ ।

स्थानीय अगुवा दार्जे लामाका अनुसार पुरानो पुरातात्विक संरचनाको रुपमा यकिन गरिएको उक्त गुम्बा भूकम्पले पूरै भत्किएको थियो । कार्यक्रममा आयोजना कार्यान्वयन इकाइका अनुसार भारतले भूकम्पपछि सम्पदा पुनर्निर्माणको शीर्षकका लागि ५० मिलियन अमेरिकी डलर अनुदानको घोषणा गरेको थियो । सोही अनुदानअन्तर्गत उक्त गुम्बा निर्माणका लागि रकम उपलब्ध गराइएको हो ।

आयोजना कार्यान्वयन इकाइका निर्देशक अधिकारीले सिन्धुपाल्चोकमा मात्र ७ वटा गुम्बा निर्माणको योजना रहेको बताए । एउटाको भने निर्माण सकिएको छ ।