२० चैत, सिन्धुपाल्चोक । नेपाल कम्युनिष्ट पार्टी (एमाले) को जिल्ला कमिटी सिन्धुपाल्चोकको अध्यक्षमा होम नारायण श्रेष्ठ निर्वाचित भएका छन् ।
कमिटिको दशौँ जिल्ला अधिवेशनको मंगलवार सम्पन्न मतगणना अनुसार कमल नेपाललाई हराउँदै श्रेष्ठ अध्यक्षमा निर्वाचित भएका हुन् । श्रेष्ठ र नेपाल आ–आफ्नै प्यानल बनाएर चुनावी मैदानमा होमिएका थिए ।
उपाध्यक्ष पदका लागी विष्णुमणी आचार्य लाई पराजित गर्दै अर्जुन कुमार भण्डारी निर्वाचित भए । त्यस्तै, सचिवमा यज्ञराज सापकोटालाई हराउँदै कृष्णगोपाल तामाङ निर्वाचित भए ।
उपसचिवमा विजयकृष्ण श्रेष्ठलाई हराउँदै शिवहरी सापकोटा विजयी भए । उपसचिव महिलातर्फ भने शोभा कार्कीलाई पराजित गर्दै सुशिला पाख्रिन निर्वाचित भइन ।
अधिवेशनले १०३ सदस्यीय कमिटी चयन गर्नेछ। त्यसमध्ये जनजाति खुलातर्फ दुई सदस्यमा उम्मेदवारी नै परेको छैन।विभिन्न क्लष्टरबाट ५६ जना सदस्य निर्विरोध चुनिइसकेका छन् भने पदाधिकारीसहित ४४ पदमा चुनाव भएको निर्वाचन समितिले जानकारी दिएको छ।
अधिवेशनमा सात सय ४७ जना प्रतिनिधि थिए । नयाँ नेतृत्वका लागि भएको मतदानमा कुल ७ सय १३ मत खसेकाे थियाे ।
