सिन्धुपाल्चाेक । कला संस्कृतिको संरक्षण गर्ने उद्धेश्यले आयोजना गरिएको मेलम्ची नगरस्तरीय खैजडी भजन प्रतियोगिता मंगलवार मेलम्चीमा सम्पन्न भएको छ । मेलम्ची नगरपालिकाको आयोजना र जेष्ठ नागरिक सञ्जाल मेलम्ची नगरपालिकाको समन्वयमा भएको प्रतियोगितामा नगर भित्रका ८ वटा वडा सहभागी भएको थियो ।
जसमा मेलम्ची नगरपालिका वडा नम्बर १२ पहिलाे, वडा नम्बर ८ दोस्रो र वडा नम्बर १० तेस्रो भयो । प्रतियोगितामा पहिलो दोस्रो र तेस्रो हुनेले क्रमश नगद १२ हजार,१० हजार र ८ हजार पुरस्कार प्राप्त गरेको छ ।
कार्यक्रमलाई सम्बोधन गर्दै मेलम्ची नगरपालिकाका प्रमुख आइतमान तामाङले नगरपालिकाले जेष्ठ नागरिकहरुलाई सम्मान गर्दै कला र संस्कृतिको संरक्षणका लागि विभिन्न कार्यक्रम गरिरहेको स्मरण गरे । उनले जेष्ठ नागरिक हाम्रो समाजको गहना भएकाले उनिहरुसँग भएका प्रतिभा तथा कलाहरुको संरक्षण गर्दै पुस्तान्तरणको खाँचो रहेको औल्याए ।
उपप्रमुख उमा प्रधानले मौलिक कला र संस्कृतीको प्रचारप्रसार र संरक्षण जरुरी रहेको बताइन । कार्यक्रमका सभापति नगर जेष्ठ नागरिक सञ्जालका अध्यक्ष एकादत्त धितालले लोप हुन लागेको मौलिक भजन जोगाउन तथा प्रचारप्रसार गर्न प्रतियोगिताको आयोजना गरेको बताए ।
