सिन्धुपाल्चाेक । बन डढेलो लगाउनेको प्रमाण सहित जानकारी गराएमा हेलम्बु गाउँपालिकाले ५० हजार पुरस्कार दिने भएकाे छ । मंगलवार एक सूचना जारी गर्दै गाउँपालिकाले साे निर्णय गरेकाे हाे ।

पछिल्ला दिनहरुमा बन डढेल्लोको घटना बढिरहेका छन् । बन डढेलोका कारण निस्किएको धुवाँको त्वालोले अहिले आकाश ढाकेको छ । तर बनमा डढेलो लगाउने ब्यक्ति पहिचान गर्न नसक्दा दिन प्रतिदिन यस्ता घटनाहरुले प्रसय पाइरहेका छन् ।

त्यस्ता क्रियाकलापहरूबाट वन क्षेत्र लगायत मानव स्वास्थ्य तथा समग्र वातावरणमा नै नकारात्मक प्रभाव पर्ने भएकाले यस्ता घटनालाई नियन्त्रण गर्न सिन्धुपाल्चोकको हेलम्बु गाउँपालिकाले बन डढेलोमा संलग्न व्यक्तिको बारे स–प्रमाण जानकारी गाउँपालिकामा गराएमा सूचनादाताको नाम गोप्य राखी निजलाई ५० हजार पुरस्कार प्रदान गरिने गाउँपालिका निमित्त प्रमुख प्रशासकिय अधिकृत धनध्वज लामा द्धारा जारी सुचनामा उल्लेख छ ।

हेलम्बुबासी लगायत सम्बद्ध सबैमा वन क्षेत्रमा डढेलो लगाउने जस्ता कुनै पनि कार्य नगर्नु हुन समेत सूचना मार्फत आग्रह गरिएको छ । अन्यथा वन ऐन २०७६ को दफा ५० को उपदफा (४) लगायतका प्रचलित नियमानुसार कानुनी कारबाहि गरिने सुचनामा उल्लेख छ ।