पाँचपोखरी थाङपाल गाउँपालिकाको आर्थिक बर्ष २०८१/८२ को बार्षिक समिक्षा कार्यक्रम सम्पन्न भएको छ । गाउँपालिकाको सभाहलमा आयोजित कार्यक्रममा पालिका भित्र क्रियाशिल विभिन्न संघसंस्थाहरुले गरिरहेका काम,आगामी योजना,संभावना,अवसर र चुनौतीका बारेमा आआफ्नो प्रस्तुतीकरण गरेका थिए । कार्यक्रममा गाउँपालिकाले गरेका कार्य सम्पदाका बारेमा पालिका प्रशासकिय अधिकृत रामप्रसाद न्यौपानेले प्रस्तुतीकरण गर्नुभएको थियो । कार्यक्रमलाई सम्बोधन गर्दै गाउँ पालिकाका अध्यक्ष टासी लामाले गाउँपालिकाले सन्तोष जनक काम गरिरहेको दावी गर्नुभयो ।

उहाँले शिक्षा,स्वास्थ्य,पर्यटनका क्षेत्रमा गाउँपालिकाले गर्वगर्न लायक काम गरेको उद्घोष गर्दै शिक्षा र स्वास्थ्यमा जिल्लामा पहिलो भएको बताउनुभयो ।उहाँले हालसम्मका उपलब्धि र प्रगतिलाई निरन्तरता दिन आगामी बर्षहरुमा समेत अगाडि बढाउन सबैको साथ र सहयोगको अपेक्षा गर्नुभयो ।

उहाँले सबैको साथ,सहयोग,समर्थन एकमना र एकताका कारण गाउँपालिकाले आज सुविधा सम्पन्न अन्य पालिकाहरु संग हरेक क्षेत्रमा प्रतिस्पर्धा गरिरहेको जिकिर गर्नुभयो । अध्यक्ष लामाले कर्तव्यनिष्ठ भएर सेवा गर्न निर्देशन समेत दिनुभयो । कार्यक्रममा उपाध्यक्ष सुनिता अधिकारी,प्रमुख प्रशासकिय अधिकृत लक्ष्मण कुईंकेल,पालिकाका प्रवक्ता नारायण भट्टराई,वडा अध्यक्षहरु,विभिन्न शाखाका प्रमुख तथा प्रतिनिधि लगायतको उपस्थिती रहेको थियो ।