मेलम्ची । जरायटार साना किसान कृषि सहकारी संस्थाको ५औँ वार्षिक साधारणसभा सम्पन्न भएको छ । सहकारीका अध्यक्ष शिवप्रसाद भट्टराईको अध्यक्षतामा सम्पन्न कार्यक्रममा मेलम्ची नगरपालिकाका नगर प्रमुख आइतमान तामाङ प्रमुख अतिथिका रूपमा सहभागी हुनुहुन्थ्यो ।
कार्यक्रममा मेलम्ची नगरपालिका–११ का वडा अध्यक्ष चन्द्रबहादुर तामाङ, प्रदेश कृषि सहकारी संघका सचिव, जिल्ला कृषि सहकारी संघका अध्यक्ष मित्रलाल चौलागाईं, सचिव रामशरण गिरि लगायतले मन्तव्य राख्नुभएको थियो ।
प्रमुख अतिथि नगर प्रमुख तामाङले सहकारीलाई नीति तथा कानुनले मिलेसम्म नगरपालिकाबाट आवश्यक सहयोग गरिने प्रतिबद्धता व्यक्त गर्नुभयो । उहाँले सहकारीबाट ऋण लिने सदस्यहरूले समयमै किस्ता तिरे सहकारीलाई समस्याबाट जोगाउन सकिने भन्दै यसतर्फ सबैको ध्यान जान आवश्यक रहेको बताउनुभयो ।

जिल्ला कृषि सहकारी संघका अध्यक्ष मित्रलाल चौलागाईंले सदस्यहरूले बीमा र बचतमार्फत जोखिम व्यवस्थापन गर्नुपर्नेमा जोड दिँदै सहकारीसँग सम्बन्धित विविध जानकारी प्रदान गर्नुभयो ।
कार्यक्रममा सहकारीका अध्यक्ष भट्टराईले वार्षिक प्रतिवेदन प्रस्तुत गर्नुभएको थियो भने आर्थिक प्रतिवेदन प्रबन्धक नन्दप्रसाद चालिसेले प्रस्तुत गर्नुभयो । सहकारीमा हाल १ हजार १ सय ५४ जना सदस्य रहेको प्रबन्धक चालिसेले जानकारी दिनुभयो । चालु आर्थिक वर्षमा सहकारीले १३ प्रतिशत सेयर बोनस वितरण गरेको पनि जनाइएको छ ।
यस्तै, लेखा तथा सुपरिवेक्षण समितिको प्रतिवेदन संयोजक कौसिला ढकालले प्रस्तुत गर्नुभएको थियो । कार्यक्रमको सञ्चालन सञ्चालक समिति सदस्य टिकादत्त धितालले गर्नुभएको थियो ।