पाँचपोखरी थाङ्पाल गाउँपालिका ५–गुन्सामा रहेको श्री कुम्भेश्वरी आधारभूत विद्यालयका १६५ जना विद्यार्थीका अनुहारमा खुसी छाएको छ । जाडोको कठ्याङ्ग्रिने मौसममा न्यानो ट्रयाकसुट वितरण भएपछि विद्यालय परिसर बालबालिकाको मुस्कानले भरिएको छ ।

बागमती प्रदेशका सांसद तथा पूर्व मन्त्री युवराज दुलालले एक विशेष कार्यक्रमका बीच विद्यार्थीहरूलाई न्यानो ट्रयाकसुट हस्तान्तरण गर्नुभयो । दुर्गम क्षेत्रमा शिक्षा हासिल गरिरहेका बालबालिकाको आवश्यकतालाई मध्यनजर गर्दै गरिएको यो सहयोगले शिक्षा प्रतिको सामाजिक जिम्मेवारीलाई थप मजबुत बनाएको छ ।
कार्यक्रममा सांसद दुलालले चिसोले गर्दा कुनै पनि बालबालिकाको पढाइ रोकिन नहुने बताउनुभयो । यदि कसैलाई विद्यालय जान समस्या छ भने हामी अभिभावकको भूमिकामा साथ दिन तयार छौं,” उहाँले भन्नुभयो ।
उहाँले अभिभावकहरूलाई आफ्ना बालबालिकालाई नियमित विद्यालय पठाउन आग्रह गर्दै गुणस्तरीय शिक्षालाई केन्द्रमा राखेर स्थानीय सरकारले कार्यक्रम ल्याउनुपर्नेमा जोड दिनुभयो ।
सांसद दुलालले यस सहयोगमा साथ दिने महेन्द्र घोरासैनी, काभ्रेका विष्णु गौतम, बाराका विनोद प्रसाद गुप्ता तथा धर्मसागर ढकालप्रति हार्दिक आभार व्यक्त गर्नुभयो ।

इन्द्रावती गाउँपालिकाको सूचना

दुलालले आफुले गरेको आग्रहमा आएको सहयोगले आज नानीहरूको जाडोमा सहज भएको बताउनुभयो ।
उहाँले विगतमा आफू सामाजिक विकास मन्त्री हुँदा गाउँपालिकाकै नमुना विद्यालयका लागि जग्गा प्राप्तिदेखि पूर्वाधार निर्माण, बजेट व्यवस्थापन तथा विद्यालय बसको व्यवस्था गरिएको स्मरण गराउँदै शिक्षा र स्वास्थ्य क्षेत्र सुदृढ बनाउन निरन्तर लागिरहने प्रतिबद्धता व्यक्त गर्नुभयो ।
विद्यालय प्रशासनले यस सहयोगले विद्यार्थीको नियमित उपस्थिती र अध्ययनमा सकारात्मक प्रभाव पार्ने विश्वास व्यक्त गरेको छ । कार्यक्रममा वडा अध्यक्ष काले गोले, अभिभावक तथा स्थानीय बासिन्दाको उल्लेख्य सहभागिता रहेको थियो ।
जाडोको चिसोबीच न्यानो कपडासँगै आएको यो सहकार्यले गुन्साका बालबालिकाको जीवनमा आशा र आत्मविश्वास थपेको छ ।