सुकुटे । शिक्षा विकास तथा समन्वय इकाई सिन्धुपाल्चोकका प्रमुख कृष्ण सुवेदीले सामुदायिक विद्यालय र संस्थागत विद्यालयको शैक्षिक स्थिति हेर्दा संस्थागत विद्यालयले उत्कृष्ट अंक ल्याउन सफल भएको बताएका छन ।

निजी तथा आवासीय विद्यालय अर्गनाइजेशन नेपाल सिन्धुपाल्चोकको वार्षिक साधारणसभामा मन्तब्य राख्दै उनले आफुले कहिल्यै पनि संस्थागत र सामुदायिक विद्यालय भनेर विभेद नगरेको उल्लेख गरे । साथै सधैंभरि हातेमालो गर्दै अगाडि बढ्ने प्रतिबद्धता समेत जनाए ।

उनले स्थानीय सरकारसंग समन्वय गर्दै अगाडि बढ्न पर्ने उल्लेख गर्दै दक्ष विद्यार्थी उत्पादनमा महत्त्वपूर्ण भुमिका खेल्ने निजि विद्यालयलाई पनि स्थानीय सरकारले संगै जोड्दै लैजान पर्ने धारणा राखे ।

निजी तथा आवासीय विद्यालय अर्गनाइजेशन नेपालका उपाध्यक्ष कृष्ण अधिकारीकाे प्रमुख आतिथ्यता कार्यक्रम भएकाे हाे । कार्यक्रम लाई सम्बाेधन गर्दै उनले तलव भन्दा बढी मिहेनत र मिहेनत भन्दा बढी बिश्वास गरेर निजि विद्यालयका शिक्षकहरु काममा खट्ने गरेको दावी गरे । दक्ष विद्यार्थी उत्पादन गर्ने लक्ष्यका साथ अगाडि बढेको निजि विद्यालयले उत्पादन गरेका विद्यार्थीहरुले अहिले पनि उच्च र प्रशंंसनिय कार्य गरिरहेको उनले बताए ।

कार्यक्रममा सांगठनिक प्रतिवेदन सचीव बुद्धिप्रसाद आचार्य र आर्थिक प्रतिवेदन प्याब्सनका कोषाध्यक्ष मदनकुमार सापकोटाले प्रस्तुत गरे । करिब २७ वटा निजि विद्यालय रहेको जिल्लामा १९ वटा विद्यालय प्याब्सनमा आबद्ध रहेको सचीव बुद्धिप्रसाद आचार्यले जानकारी दिए ।