मेलम्ची । सामाजिक अध्ययन तथा अनुसन्धान समाज नेपाल, सिन्धुपाल्चोकले मेलम्ची नगरपालिका भित्रका विद्यालयमा कार्यरत सामाजिक विषय शिक्षकहरुको एक दिने क्षमता विकास कार्यशाला भेला मेलम्ची नगरपालिकाको सहयोगमा सम्पन्न गरेको छ ।

आधारभूत तथा माध्यमिक तहको सामाजिक अध्ययन विषयको पाठ्यक्रम प्रबोधिकरण, आन्तरिक मूल्याङ्कन प्रक्रिया एवं साधन, सैद्धान्तिक मूल्याङ्कनका लागि प्रश्नपत्र निर्माण लगायतका विषयमा समाजका केन्द्रिय महासचिब ज्ञानबहादुर अधिकारीको सहजीकरणका शनिबार उक्त कार्यक्रम सम्पन्न भएको हो । आधारभूत तथा माध्यमिक तहमा कार्यरत करिव ३५ जना शिक्षकहरुको सहभागितामा कार्यक्रम भएकाे हाे ।

कार्यक्रममा पालिकाभित्रका विद्यालयहरुमा आन्तरिक मूल्याङ्कनका सम्बन्धमा भइरहेका अभ्यास र चुनौतीहरुकोहरुको आदानप्रदान गरिनुका साथै मूल्याङ्कनमा एकरुपताका निम्ति प्रतिवद्धता गरिएको छ ।

पाठ्यक्रममा परिवर्तन भएपनि त्यस अनुसार शिक्षकको तहसम्म पर्याप्त प्रबोधिकरण हुन नसक्दा पाठ्यक्रमको मर्म अनुसार सिकाइ सहजीकरण र मूल्याङ्कन प्रक्रियालाई एकरुपता ल्याउन कठिन भइरहेको अवस्थालाई मध्यनजर गर्दै आगामी दिनमा शिक्षकहरुकै अग्रसरतामा आपसमा अनुभव र अभ्यासहरुको आदानप्रदान गर्ने गरी विषयगत विज्ञहरुको सहजीकरणमा निरन्तर यस्ता कार्यक्रम गर्दै जाने योजना रहेको समाजका सदस्य एवं तेर्से मा.वि.का सामाजिक शिक्षक कृष्ण ढुङ्गानाले जानकारी दिए ।