सिन्धुपाल्चाेक । दिगो विकासका लागि प्राङगारिक कृषि अभियान भन्ने नाराका साथ मंगलवार पाँचपोखरी थाङ्पाल गाउँपालिका वडा नम्बर ३ भोताङका किसानलाई प्राङगारिक प्रमाणिकरण चिन्ह तथा प्रमाणपत्र वितरण गरिएको छ ।
पाँचपोखरी थाङपाल गाउँपालिका कृषि विकास शाखाको सहयोगमा सेर्च्यु बरलो साना किसान कृषि सहकारी संस्थाद्वारा सञ्चालित सहभागीतामुलक गुणस्तर निर्धारण प्रणाली (पि.जि.एस) अन्तर्गत प्राङगारिक प्रमाणिकरण चिन्ह तथा प्रमाणपत्र वितरण गरिएको कृषि शाखा प्रमुख निमराज गिरीले जानकारी दिए ।
कार्यक्रममा गाउँपालिकाका अध्यक्ष टासी लामाले अर्गानिक प्रमाणीकरणले गाउँपालिकालाई चिनाउन मद्दत पुग्ने बताए । प्लास्टिक मुक्त पालिका बनाउन समेत यस्ता कार्यक्रमले फाइदा लामाकाे भनाई छ । लामाले पालिकामा करिब १० प्रतिशत मात्र जग्गा बाँझो रहेको बताउदै अहिले निरन्तर किसानहरु कृषि पेशामा सक्रिय हुँदै गएकोमा खुशी व्यक्त गरे ।
वडा अध्यक्ष ङिमाछिरिङ तामाङले लोकल रुपमा उत्पादन भएको वस्तु अब देशब्यापी बनाउन आवस्यक रहेको बताए वडा अध्यक्ष तामाङले अन्तर्राष्ट्रिय स्तरमा यहाँको उत्पादन पुर्याउन संभव भएको भन्दै अहिले निरन्तरता दिँदै हरियो प्रमाणीकरण गर्ने दिन छिट्टै आउने बताए ।
प्रशिक्षक कपिल प्रजापतिले एक बर्ष भित्रमा पाएको यो उपलब्धीले खुशी लागेको बताए । उनले केहि अफ्ट्यारो भएपनि निरन्तरता दिएकोमा किसानलाई धन्यवाद व्यक्त गरे ।
कार्यक्रमको अवसरमा ४० जना किसानलाई अर्गानिक प्रमाणीकरण प्रमाणपत्र प्रदान गरिनुका साथै सम्मान गरिएको थियो । कार्यक्रमको अवसरमा आर्सो नेपालले उपलब्ध गराएको टनेल किसानलाई वितरण गरिएको थियो । तालिमको प्रशिक्षक प्रजापति, राम्जी ढकाल, वडा कृषि प्राविधिक मनिष श्रेष्ठ, पशु सेवा प्राविधिक रविन ढुंगाना लगायतले सहजीकरण गरेका थिए ।
