बालबालिकाको हक, अधिकार र सुरक्षातर्फ समुदायमा सचेतना जगाउने उद्देश्यले श्री सरस्वती माध्यमिक विद्यालय, हेलम्बु–४, ग्यल्थुममा आज एक विशेष बाल सुरक्षा तथा मानव बेचबिखन विरुद्धको अभिमुखीकरण कार्यक्रम सम्पन्न भएको छ ।
कार्यक्रमको आयोजना चाइल्ड रेस्क्यु नेपाल तथा साझेदारी नेपालले संयुक्त रूपमा गरेका थिए भने विद्यालयले कार्यक्रमको समन्वय गरेको थियो ।

कार्यक्रममा विद्यालयका विद्यार्थी, शिक्षक, विद्यालय व्यवस्थापन समिति (बि.व्य.स)का प्रतिनिधि तथा अभिभावकहरूको उल्लेखनीय उपस्थिति रहेको थियो ।
कार्यक्रमका प्रमुख वक्ता तथा चाइल्ड रेस्क्यु नेपालका कार्यकारी निर्देशक श्री कृष्ण थापाले बाल सुरक्षा र साइबर सुरक्षासम्बन्धी सन्देशमूलक प्रस्तुति दिनुभयो । उहाँले वर्तमान डिजिटल युगमा बालबालिकाको मनोवैज्ञानिक, सामाजिक तथा डिजिटल सुरक्षाको महत्वबारे अभिभावक र विद्यालय दुवैलाई जागरुक बनाउने सशक्त सन्देश दिनुभयो ।
कार्यक्रमको अन्त्यमा अभिभावक र विद्यालयबीच बालबालिकाको संरक्षण, मार्गदर्शन र सुरक्षामा साझा सहमति र प्रतिबद्धता जाहेर गरिएको थियो ।

विद्यालयका प्रधानाध्यापक श्री कुमार घोरासैनीले कार्यक्रमलाई सफल र प्रभावकारी बनाउन योगदान पु¥याउने सम्पूर्ण सहभागी, संस्थागत प्रतिनिधि र सहयोगी हातहरूप्रति आभार प्रकट गर्नुभयो ।
सामाजिक उत्तरदायित्वमा अग्रणी रहेको चाइल्ड रेस्क्यु नेपालले यसअघि पनि विद्यालयमा “नमुना किचेन गार्डेन” स्थापना गर्न सहयोग पु¥याएको थियो, जसले विद्यार्थीहरूमा आत्मनिर्भरता, स्वच्छता र वातावरणीय सचेतना अभिवृद्धि गरेको थियो ।
बालसुरक्षा र शैक्षिक सुधारका यस्ता अभियानहरूले विद्यालय र समुदायबीचको सहकार्यलाई अझ सुदृढ बनाउने विद्यालय प्रशासनले विश्वास व्यक्त गरेको छ ।