मेलम्ची । सडक दुर्घटनामा मृत्यु भएका अनेरास्ववियु सिन्धुपाल्चोकका सह–संयोजक नवीन पाण्डेको परिवार संरक्षणार्थ पाँच लाख पन्ध्र हजार प्रदान गरिएकाे छ ।
विभिन्न समुह एवम् ब्यक्तिहरुबाट संकलित पाँच लाख पन्ध्र हजार रुपैयाँ नाबालिका नेहारिकाकि आमा र हजुरआमा ( स्व .नबिनकि आमा) को संयुक्त संरक्षकत्व रहने गरि नेहारिकाको शैक्षिक उन्नयनमा खर्च गर्नको लागी रकम हस्तान्तरण गरिएको हाे ।
नेकपा एमाले मेलम्ची नगर कमिटीले आर्थिक संकलन अभियान सुरू गरेकाे थियाे । स्वर्गीय नवीन पाण्डे परिवार राहत तथा मृतक पाण्डेकी नाबालिग छोरी नेहारिका पाण्डेको शैक्षिक संरक्षण कोष’ स्थापना गर्दै नगर कमिटीले आर्थिक अभियान सञ्चालन गरेको थियो ।
स्वर्गीय पाण्डेको ६ वर्षीय छोरी निहारिका पाण्डेको शिक्षा दीक्षा र परिवारको आर्थिक स्थिती उकास्नका लागी सुरु गरिएको अभियानमा विभिन्न ब्यक्ति तथा संघ संस्थाहरु बाट सहयोग प्राप्त भएको नेकपा एमाले मेलम्ची नगर कमिटिका अध्यक्ष विजयकृष्ण श्रेष्ठले जानकारी दिए । स्वर्गीय पाण्डेको आमा, श्रीमती र एक छोरी छन् ।
गत भदौं ३० गते चौतारा साँगाचोकगढी नगरपालिका–९ घुमाउने डाँडामा ट्याङ्करको ठक्करबाट पाण्डेको निधन भएको थियो । दुर्घटनामा परी मोटरसाइकल चालक पाँचपोखरी थाङ्पाल गाउँपालिका–१ बासखर्कका समिर तामाङको मृत्यु भएको हो । मृतक दुवै जना अनेरास्ववियु सचिवालय बैठकका लागि बाह्रबिसे जाने क्रममा दुर्घटनामा परेका थिए ।
