मेलम्ची — ज्यामिरे— गुफाडाँडा —पर्यटन मार्ग स्तरोन्नतिको शिलान्यास गरिएको छ । बुधबार मेलम्ची नगरपालिकाका प्रमुख आइतमान तामाङले पर्यटन मार्ग अन्तर्गत मेलम्ची १० को जिरो पोइन्टबाट स्तरोन्नतिको शिलान्यास गरेका हुन ।

मेलम्ची नगरपालिकाको २ करोड ५९ लाख रुपैयाँको लागतमा गेहेन्द्रलक्ष्मी निमार्ण सेवा तथा जुगल हिमशिखर जेभीेले सडक कालो पत्रे, ढलान लगायतको काम गर्न लागेको हो । जलवायु सम्मेलन भएको पर्यटकीय क्षेत्र गुफाडाँडा जोड्ने सडकमा संघीय सरकारको ध्यान नपुगेपछि नगरपालिकाको बजेट बाट सडक स्तरोन्नतिको काम गर्न लागेको नगर प्रमुख तामाङले बताए ।

इन्द्रावती गाउँपालिकाको सूचना

संघ तथा प्रदेश सरकारले मेलम्चीको विकासमा ध्यान नदिएको भन्दै चुनावमा गरेको प्रतिवद्धता पुरा गर्न संघ तथा प्रदेश सरकारका प्रतिनिधिलाई तामाङले आग्रह गरे । सडक निर्माणको क्रममा गुणस्तर र परिमाणमा ध्यान दिन तामाङले निर्माण व्यवसायीलाई निर्देशन समेत दिए ।

वडा नम्बर ९ का अध्यक्ष किरणदिप खड्काले क्रमसः गुफाडांडा सम्म सडक कालोपत्रे तथा ढलान गरिने जानकारी दिए । शिलान्यास कार्यक्रममा वडा नं. ९ र १० का वडाअध्यक्षहरु किरणदिप खड्का र अमृत खनाल तथा वडा नं. १० का पूर्व वडाअध्यक्ष भक्तबहादुर खड्का लगायतको सहभागिता थियो ।