सिन्धुपाल्चोक जिल्लामा नौ हजारभन्दा बढी नयाँ मतदाता थपिएका छन् । आगामी फागुन २१ गते हुने प्रतिनिधिसभा सदस्य निर्वाचनका लागि मतदाता नामावली दर्ता अभियान सञ्चालन गरिएकामा जिल्लामा ९ हजार ३१९ मतदाता थपिएका हुन् ।
गत असोज १० देखि मङ्सिर ५ गतेसम्म मतदाता दर्ता गर्न सकिने व्यवस्था रहेकामा कार्यालयमा पुगेर र राष्ट्रिय परिचयपत्रमार्फत मतदाता नामावली दर्ता भएको जिल्ला निर्वाचन कार्यलय सिन्धुपाल्चोकका सुचना अधिकारी सर्मिला चौलागाईंले जानकारी दिनुभयो ।
चौलागाईंका अनुसार कार्यालयमै पुगेर दुई हजार ३८० जनाले नाम दर्ता गराएका छन् । त्यसमध्ये महिलाको सङ्ख्या ९२८ र पुरुषको सङ्ख्या एक हजार ४५२ रहेको छ । यस्तै राष्ट्रिय परिचयपत्रमार्फत छ हजार ९३९ जनाले नाम दर्ता गराएका छन् ।
राष्ट्रिय परिचयपत्र बनाएकाले सिधै अनलाइनमार्फत नाम दर्ता सक्ने व्यवस्था गरिएपछि मतदातालाई सहज भएको छ । कार्यालयमा पुगेरभन्दा धेरै मतदाताले राष्ट्रिय परिचयपत्रमार्फत नाम दर्ता गराएको कार्यालयले जनाएको छ ।
यसैगरी २ सय ५० जनाले ठाउँसारी र २ सय ५० जनाले त्रुटि सच्याउनका लागि कार्यालयमा निवेदन दिएको चौलागाईंले बताउनुभयो । विसं २०८२ असोज १० गतेसम्म जिल्लामा दुई लाख ६५ हजार १९१ जना मतदाता रहेको कार्यालयले जनाएको छ ।

इन्द्रावती गाउँपालिकाको सूचना