देशभर जस्तै नेकपा एमालेले सिन्धुपाल्चोकको खाडीचौरमा शनिबार भव्य शक्ति प्रदर्शन गर्दै आगामी राजनीतिक यात्रामा आफूलाई बलियो पूर्वाधारसहित अघि बढाउने संदेश दिएको छ । जिल्लाका नेता, जनप्रतिनिधि र हजारौँ कार्यकर्ता सहभागी यस सभामा नेताहरुले हाल एमाले विरुद्ध भइरहेका ‘अनावश्यक हमलाको प्रतिरक्षा जनताले नै गर्नेछन्’ भन्दै पार्टीलाई जिल्लाको पहिलो शक्ति बनाउन ऐक्यबद्ध भएर लाग्ने प्रतिबद्धता व्यक्त गरे।

कार्यक्रमलाई सम्बोधन गर्दै स्थायी कमिटी सदस्य शेरबहादुर तामाङले विशाल जनसहभागिताले एमाले प्रती जनआस्था र समर्थन अझ मजबुत बनेको प्रमाण भएको बताए। “सिन्धुपाल्चोकमा एमाले प्रति जुन उत्साह र विश्वास छ, त्यसले आगामी दिनमा हामीलाई पहिलो दल बन्न रोक्ने कुनै शक्ति छैन,” उनले भने।

त्यस्तै, जिल्ला इन्चार्ज सरेस नेपालले एमाले विरुद्ध चलाइएका प्रहार र दुष्प्रचारको सबैभन्दा ठूलो जवाफ जनसागर नै भएको उल्लेख गर्दै, “सिन्धुपाल्चोकमा एमालेको गतिशीलता, संगठन र जनसमर्थनलाई कसैले रोक्न सक्दैन,” भन्ने उद्घोष गरे। उनले वर्तमान राजनीतिक परिवेशमा एमाले नै स्थिरता, विकास र सुशासनको एक मात्र विकल्प भएको दाबी गरे।

सभामा पार्टीका अन्य नेता तथा जनप्रतिनिधिहरूले पनि हालको राजनीतिक द्वन्द्व, चुनौतिहरू र अगाडि बढ्ने रणनीतिबारे आफ्ना धारणा राख्दै संगठनलाई अझ सुदृढ बनाउने प्रतिवद्धता व्यक्त गरे।
कार्यक्रममा विभिन्न लोकप्रिय कलाकारका सांगीतिक तथा सांस्कृतिक प्रस्तुतीहरूले माहोल झनै उत्साहपूर्ण बनाएको थियो। विशाल कार्यकर्ता सहभागितासहित सम्पन्न खाडीचौरको यो शक्ति प्रदर्शनले एमालेले जिल्लामा आगामी चुनावी प्रतीकात्मक संकेत दिएको स्थानीयको भनाइ छ ।